Girkuid máilmmiráđi čoahkkin lea jođus Duiskkas, Karlsruhes. Dáhpáhusas lea maiddái prográmma álgoálbmogiidda ja vel sierra álgoálbmotnuoraide.
Suoma beal Sámis mielde leat girkuid máilmmiráđi álgoálbmogiid referanšajoavkku ságadoalli, sámebáhppa Mari Valjakka ja nuoraidprográmma lágideapmái oassálastán Sara Keränen.
Keränen lohká, ahte báikki alde leat máilmmiviidosaččat árvalusa mielde 50 eamiálbmotnuora ja oktiibuot nuoraidprográmmii oassálastet 400 nuora.
– Lea hui dehálaš, ahte dán plánenjoavkkus lea leamaš álgoálbmotovddasteaddjit fárus ja álgoálbmotnuorat leat beassan fárrui dán prográmmii ja oidnosii, lohká Keränen.
Čoahkkimis leat dehálaš oassin panelaságastallamat iešguđet fáttáin. Sáhka lea earret eará Eurohpa váttis dilis, mas mearkkašahtti fáddán lea Ruošša falleheapmi Ukrainai. Áššis muitala Kotimaa-aviisa.
Aviissa mielde ságastallamiin gieđahallet maid earret eará dálkkadatnuppástusa, ráfi ja soabadeami ja koronapandemiija váikkuhusaid. Čoahkkima prográmmas leat ipmilbálvalusat, Biibbala dutkan ja rohkosbottut.
Nuoraidprográmma nogai maŋŋebárgga, muhto Keränen bázii vel čuovvut váldočoahkkima.
– Vuorddán oaidnit, makkár ieš dat váldočoahkkin lea ja mo dat ekumeniija dáppe doaibmá, Sara Keränen dadjá.
Girkuid máilmmiráđđi lea kristtalaš girkuid riikkaidgaskasaš ovttasbargoorgána. Dasa gullet 349 girku badjel 120 riikkas.
Beaivvi ságaid ja Yle Ođđasiid Sámis sáhtát maid guldalit Yle Areenas.