Vuohču ođđa skuvlavisti lea gárvánan. Mannan vahkus beaivedikšu beasai juo fárret ođđa lanjaide ja dán vahku álggu rájes skuvlavistái besset maid skuvllalaččat.
Boares skuvllas skuvllalaččat ja bargit šadde gillát máŋggaid jagiid sisáibmováttisvuođain. Árrabajásgeassima oahpaheaddji Nina Hirvonen illuda, go sii viimmat leat beassan dearvvašlaš vistái.
– Stuorimus dovdu lea dat, ahte mis leat dál dearvvas sajit. Mis leat buorit ja čuvges sajit, main mánát liikojit leat, dadjá Hirvonen.
Dán rádjái skuvla ja árrabajásgeassin leat doaibman sierra sajiin, muhto dán vahku rájes leat unnit mánát ja skuvllalaččat seamma seinniid siskkobealde. Skuvlla bealde leat 40 oahppi ja beaivedivššus fas 14 máná. Oktan bargiiguin ođđa visttis leat beaivválaččat birrasiid 70 olbmo.
– Šaddá somá ja miellagiddevaš, go árrabajásgeassin ja vuođđooahpahus barget ovttas ja ovttastahttit min doaibmavugiid. Dain doaibmasajiin šaddet leat olles Vuohču gili mánát ja nuorat, čilge Hirvonen.
Lihkadansáles čáhcevahát
Vuohču ođđa skuvlla huksejedje Soađegili márkanis bukton modulaskuvllas. Dasa lassin huksejedje vel ođđa osiid skuvlavistái, maid ovttastahtte boares lihkadansálii. Sále goit eai sáhte vel váldit atnui, go juovlamánus gávnnahedje doppe čáhcevahága.
– Dieđusge dat lea hui váivi, muhto dat lea dáhpáhuvvan ja dasa ii veaje dal maidige. Dálhan mii oažžut ođđa lášmmohallansále maiddái. Ja dál mii leat dan muttus, ahte mii leat beassan fárret. Gal buohkat leat dieđusge dan vuordán, vaikko čuolmmat leat boahtán ja áigetávval lea rievdan, dadjá Hirvonen.
Lihkadansále divodeami jáhkket bistit olles giđa.
– Garvodanlanjat ja riššut leat juo buori muttus ja barggu vuolde. Daid de beassá geavahit, go oažžu dasa lobi, čilge Hirvonen.
Boares skuvllas sisáibmováttisvuođat
Skuvlla dilli lei ságastahttán juo guhká sisáibmováttisvuođaid geažil. Vuohču boares skuvlavisti huksejuvvui jagis 1969 ja divoduvvui fas jagis 2007.
Moadde jagi dassái dutkamušain čielggai, ahte boares skuvlavistti áibmomolsunrusttegiin ledje fiberat ja skuvlla seainnit ledje njuoskan.
Soađegili gielda čovddii dili nu, ahte dat mearridii sirdit Soađegili Tähtikunta-skuvlla geavahusas leamašan modulaskuvlla Vuhččui. Skuvllalaččaid vánhemat moite gieldda mearrádusa, go sii ledje vuordán, ahte Vuhččui huksejuvvošii áibbas ođđa skuvlavisti.
Gielda goit bisuhii mearrádusas ja boares skuvlavistti burgojuvvui giđđageasi 2022. Skuvllalaččat ja skuvlla bargit sirdásedje sadjásaš vistái dan boddii, go modulaskuvla gárvánii.
Sompio-aviissa mielde Vuohču skuvlla divodeapmi ja ođasmahttin lea máksán Soađegili gildii dán rádjai 1,24 miljovnna euro. Gielddas goit árvalit goluid loktanit 1,4 miljovnna euroi.