Arctic Winter Games, arktâlâš tälvikištoh, uárnejuvvojeh Kanadast 29.1.–4.2. Anarist máátkán vyelgih kulmâ Suomâ Säämiseervi čyeigee Piäkká Tervaniemi, Elias Tervaniemi já Emili Portti. Koronatile keežild kištoh sirdojii ivveest 2022 taan ihán.
Kiišton peessâm iähtun lii uásálistem Säämi valastâllâmlito kištoid já leiráid.
Arktâlâš tälvikištoh láá maailm stuárráámuuh arktisii kuávlu nuoráid uáivildum valastâllâm- já kulttuurtábáhtus. Čuoigâm lasseen nuorâin lii máhđulâšvuotâ kištottâllâđ muádlov valastâllâmšlaajâst.
Elias Tervaniemi čuáigá vuosmuu keerdi olgoenâmijn. Viljâ kale lii iällám, mut ij eidu nuuvt kukken.
– Mun lam iällám Taažâst já Ruotâst, muštâl Piäkká Tervaniemi.
Kaandâin iä lah magarehkin vuárdámušah kištoid, mut hárjuttâllâm suái lává pyereest.
– Čuoigâmkištoost lam jiärástum, ete maht tot mana, muštâl Elias Tervaniemi.
- Luuvâ meid: Kištočyeigee Pekka Tervaniemi hárjuttâl kuttâ tijme ohhoost vâi mottoom peeivi šodâččij Suomâ miäštárin
Pääihist áiguh čuávvuđ kištoid njuolgâ
Päikkijuávkku ij peesâ pääihi oolâ čuávvuđ kištoid, mutâ sii ilon taid puáhtá čuávvuđ njuolgâ vuolgâttâs peht pääihist. Kaandâi eeči Marko Tervaniemi lii tutkâm tárkká liiŋkâid já čujottâsâid valmâšin. Enni Henna Tervaniemi lii jiärástum, mutâ ilolâš ko kaandah peessâv uásálistiđ stuorrâ kiišton.
Marko Tervaniemi muštâl, ete kaandah lává nuorrân álgám čuoigâđ. Piäkká Tervaniemi vuossâmuu luokast já Elias Tervaniemi ovdâškoovlâst. Kuohtuuh láin jo talle perustum čuoigâmist.
– Kaandah lává ánsášâm taan määđhi, rámmoo Tervaniemi.
Nuorâi välmejeijee Yrjö Portti vuálgá meid fáárun Kanadan. Suu pargon lii orniistâllâđ kištohommáid já huolâttiđ nuorâin määđhi alne.
Portti osko, ete nuorâ kištočyeigein láá pyereh máhđulâšvuođah veikkâ vyeittiđ. Määđhist sun ij lah jiärástum, mutâ ohtâ huolâ sust lii.
– Ko peri iä maaccât taan määđhi oppeet, povvust Portti.
Kištoh älgih uđđâivemáánu 29.peeivi.
Kuldâl lase Anarâš saavâid tääbbin.