Vuođđoláhkaváljagoddi lea ožžon vahku lasseáiggi ođđa sámediggelága guoski smiehttamuša dahkamii. Áššis muitala Lapin kansa.
Váljagotti ságadoalli Johanna Ojala-Niemelä (SDB) muitala aviisii, ahte váljagoddi figgá oažžut smiehttamušas gárvvisin boahtte vahku áigge vai dat geargá vel riikkabeivviid gieđahallamii. Dat lea dehálaš namalassii danin, go riikkabeaivvit jienasta áššis váljagotti smiehttamuša vuođul.
Smiehttamušat galggašedje leat riikkabeivviin vuossárgga 20. guovvamánu, jus daiguin áigot geargat dán válgabaji áigge. Váljagoddi goittotge almmuhii juo ikte, ahte dat čoahkkimastá maŋŋebárgga.
Vuođđoláhkaváljagoddi bivddii ikte duorastaga vástaga riekteministeriijas láhkaevttohussii. Ministeriija vástagis soitet boahtit juogalágán nuppástusat láhkaevttohussii.
Ojala-Niemelä muitala Lapin kansa -aviisii, ahte ministeriija vástta váikkuha olu dasa, makkár vejolašvuođat lágas leat ovdánit.
Áššiin lea hoahppu, go riikkabeaivvit báhcá njukčamánu álggus válgaboddui.
Lasi dán fáttás:
- Vuođđoláhkaváljagoddi bivdá sámediggeláhkaevttohusas vástaga riekteministeriijas ja joatká gieđahallama lasseáiggis
- Vuođđoláhkaváljagoddi mearrida duorastaga, mo ovdánit sámediggeláhkaevttohusain – ságadoalli sávvá riikkabeivviid dohkkehit dárbbu mielde lassiáiggi
- Marin: Ii leat sihkkar, ahte lihkosmuvvágo sámediggelága dohkkeheapmi dán giđa áigge