Ohcejoga gielda ráđđádalai EJB-guovddážiin busseáigetávvala nuppástusain, ja dál busse fáro beassá vuot 13.3. rájes seamma beaivvi áigge Roavvenjárggas gitta Njuorggámii.
Čovdosa geažil Ohcejohnjálmmi skuvlla ja sámelogahaga skuvlabeaivvi álggahanáiggi maŋidedje nu, ahte sihke skuvlasáhtut Njuorggáma ja Ohcejoga gaskka, ja busseoktavuohta Roavvenjárggas Njuorggámii, ollašuvvet ovtta fáro Jbussiin.
Jahkedoajáldagas busseáigetávvalat nuppástuvve nu, ahte Ohcejohkii ii beassan šat Roavvenjárggas bussiin seamma jándora bealde árbabeivviid.
Máŋgasat leat duđavaččat ođastussii, muhto buohkaide dat ii leat vuogas čoavddus. Skuvlabeaivvi álgima maŋideapmi dárkkuha dan, ahte njuorggánlaš skuvlamánáid skuvlabeaivi guhkku.
Vánhen: ”Njuorggán mánáid vánhemat leat hirpmástuvvan”
Njuorggánlaš vánhen Anna Näkkäläjärvi-Länsman ii leat duđavaš mearrádussii.
– Mii Njuorggán mánáid vánhemat leat áibbas hirpmástuvvan dán rievdadusas.
Näkkäläjärvi-Länsman čilge, ahte badjeskuvlamánáin, geat johtet Njuorggámis Ohcejohkii, skuvlabeaivi guhkku busseáigetávvala rievdádusa dihte. Son lea lihkká fuolas, vaikko su mánát eai leat vel badjeskuvllas.
– Buohkat earát illudit, go leat fidnen dan oktavuođa ruovttoluotta, muhto geat das gillájit, dat leat Njuorggáma mánát. Mis ii leat oktage jearran ii maidige dán rievdadusas, son dadjá.
Ohcejoga gieldda čuvgehushoavda-rektora virgesadjásaš Kaisa Tapiola-Länsman deattuha, ahte beaivi guhkku badjeskuvlamánáin 45 minuhta.
Näkkäläjärvi-Länsman cuiggoda gieldda, go eai leat gulahallan njuorggánlaččaiguin ášši olis. Son oaidná ášši buresveadjima hedjoneapmin Njuorggáma mánnábearrašiidda.
Ohcejoga gieldda eallinfápmohoavda Tanja Lepistö fas dadjá, ahte sii leat ságastallan áššis skuvlla bargiiguin, mánáiguin ja vánhemiiguin.
– Gulaimet buot skuvlamánáid dán áššis. Sullii 90 proseantta vástideaddjiin ledje duđavaččat dán nuppástussii. Áddejin goittotge nu, ahte eanaš njuorggánlaččat livčče hálidan skuvlla álgit diibmu 9.15, Lepistö dadjá.
Son lasiha, ahte rievdadusaid dagadettiin skuvllas ledje gergosat miehtásit nuppástussii.
– Rektor ja oahpaheaddjit ságastalle áššis oahppiiguin ja vánhemiiguin, ja nu kompromissačoavddus gávdnui.
Njuorggánlaš mánát ollejit skuvllas ruoktot ovdalaš viđa
Vánhen Näkkäläjärvi-Länsman muitala, ahte vuolgga skuvlii iđđes lea sullii diibmobeali maŋŋelut go ovdal. Veaiginges sáhttu ruoktot vuolgá diimmu maŋŋelut. Mánát ollejit skuvllas ruoktot easkka ovdalaš viđa.
– Gal dat lea guhkes beaivi, jus jurddaša čihččet-gávccátluohkkálačča, dathan leat aivve mánát vel.
Lepistö jáhkká, ahte čuvgehusdoaimmas lea oktasaš ipmárdus áššis. Dasa lassin son lohká, ahte mearrádusa dagadettiin lei čielggas, ahte sii čuvvot lága skuvlabeaivvi guhkkodagas. Skuvlamátkkiide oažžu gollat áigi lága mielde beaivválaččat bistit vuollái 13 jahkáččain eanemustá 2,5 diimmu ja badjel 13-jahkásaččain golbma diimmu.
– Hálidan luohttit dasa, ahte oahpahusa ovddasvástideaddjit leat leamaš vásttolaččat smiehtadettiineaset kompromissaid, Lepistö lohká.
Lepisto vel fuomášuhttá, ahte dát čoavddus ii dagat gildii lassegoluid.
Skuvla álgáge dál Ohcejogas ovcci áigge iđđes. Skuvlasáhttu Njuorggámis Ohcejohkii vuolgá dál diibmu 8.10, go ovdal dat vulggii diibmu 7.40. Veaiginges sáhttu Ohcejogas Njuorggámii vuolgá dál 15.50, go ovdal dat vulggii diibmu 15.05. Mánát jovdet Njuorggámii diibmu 16.40.
Jbus ođđa áigetávvalat gávdnojit ovdamearkka dihte Ohcejoga gieldda neahttasiiddus.
Divvojuvvon 27.2. dii. 12:55: Njuorggáma badjeskuvlalaččaid skuvlabeaivi guhkku 45 minuhta. Dárkkálmahtton maiddái, mii lágas čuožžu skuvlamátkkiid birra.