Aanaarjäävri riddoost pajasšoddâm Heli Aikio uásálist taan ive Säämi Grand Prix -kiišton kuálmád keerdi. Taan tove sun kištottâl Piegâ kandâ -nommâsâš livđijn. Aikio lii jo algâ ohhoost vuálgám Kuovdâkiäinun ráhtádâttâđ oholoopâ kiišton.
Livđeest hárjuttâllâm lii tergâd, mutâ lyeve alne kalga mušteđ meid kameraid, kuus kiäččá já maht liihâd. Aikio livđoo ohtuu já tot lii suu mielâst sehe hyeni ete pyeri peeli.
– Livđeest ij lah muusik toorjân, te tondiet ritmâ lii tergâd já tom lam-uv hárjuttâllâm, muštâl Aikio.
Aikio lii feerim kištoost nuuvt vuáitu ko táppám. Ive 2014 Aikio vuoitij lávlumuási Naharij kandâ -pittáin, mutâ nuorvuu tiet ij pastam navdâšiđ vuáitust. Ive 2019 sun uásálistij kiišton vuosmuu keerdi livđijn, mutâ ij piergim kištoost. Talle sun lâi eskân hárjuttâlškuáttám livđuđ.
Suu mielâst taan ive kištoost láá pyereh pitáh já čepis hárjánâm jyeigeeh. Aikio ij määti ervidiđ maht sunjin kiävá kištoost, mutâ vuálgá puorijn mieláin Kuovdâkiäinun.
– Lii kal lukko, ete peesâm leđe mieldi taggaar juávhust, illood Aikio.
Kuldâl maht Heli Aikio ráhtádât Säämi Grand Prix -kiišton.
Taan ive Säämi Grand Prix kišto uárnejuvvoo cuáŋuimáánu 8. peeivi já tom puáhtá čuávvuđ Yle Areenast njuolgâ. Säämi Grand Prix kišto lii uárnejum ive 1990 rääjist já kišto vyeittee piäsá Euroop ucceeblovokielâi muusikfestivaalân. Luuvâ lase kištoost tääbbin.