Tamperelaš Red Stage Entertainment lea ráhkadan máilmmi vuosttas videospealu, mii lea obban davvisámegillii dubbejuvvon. Skábma - Snowfall muitala nuorra boazoreaŋggas, gean namma lea Áilu. Áillus šaddagoahtá sierra dáhpáhusaid bokte sámegili ođđa diehtti ja noaidi.
Speallu almmustahttui mannán jagi, ja dat vuittii Best Creative Achievement of the Year -bálkkašumi Finnish Game Awards -gálas dán jagi miessemánus.
Dál Skábma - Snowfall lea evttohassan sihke jagi speallun ja buoremus dáiddan Nordic Game Awards -gilvvus. Nordic Game Awards -bálkkašumit addojuvvojit jáhkásaš davviriikalaš Nordic Game -speallodáhpáhusas. Nordic Game lea okta Eurohpá stuorimus speallodáhpáhusain.
Jus manná bures, spealu bagadallit Sahin Cengiz ja giehtačálli Marjaana Auranen boahtiba dáhpáhusas sihke Nordic Game of the Year ja Best Art -bálkkašumit fárus.
Váikkuheaddji muitaleapmi sámevugiin
Marjaana Auranen lea sápmelaš, ja dahkkiguoktái lea dehálaš, ahte sámekultuvra oidno sierra lávddiin.
– Ovdamearkka dihte máŋggat animašuvnnat goittotge bohtet sámeservoša olggobealde, nu ahte moai háliideimme bargagoahtit iežame animašuvnna videospealu hámis, Auranen mieđiha.
Skábma - Snowfall lea ovddemužžan fantasia- ja máinnasspeallu, man ulbmilin lea buktit geavaheaddjiide váikkuheaddji ja somás speallovásáhusa, Cengiz dadjá.
– Lea sáhka ájánasspealus, ii eisige oahpahusspealus, Cengiz fuomášuhttá.
Liikká son muitala, ahte maiddái spealuid fáttát leat dehálaččat sin fitnodahkii. Jusmat Skábma - Snowfall spealuid speallan lasiha áddejumi sámevuođas, dat lea Cengiz mielas ain buoret.
Auranen lea ovtta oaivilis bargoguimmiinis, ja fuomášuhttá ahte menddo dávjá sámiid čájehit karnevállágan vugiin.
– Min ovttastahttet earret eará juovllaide, ja dat dagaha miellagova smávva donttuin, mat orrot davvin ja main leat erenomáš biktasat, Auranen čilge.
Dakkára son ii višašii šat oaidnit.
– Gealdagasas mii vuolgit dál geahččat, mo eará davviriikkat vásihit min spealu, Cengiz deahtista vuordámušaidis boahttevaš Nordic Game Awards -gálas.
15.5.2023 dii. 17:15 divvojuvvon diehtu das, ahte sihke Marjaana Auranen ja Sahin Cengiz leaba sápmelaččat. Dušše Auranen lea sápmelaš.