Avveellâš Movsháá Haanu Joovnâ Ulpu, Ulpu Mattus-Kumpunen čääliškuát kirje Movsháá historjást anarâš- já suomâkielân. Suomâ kulttuurruttârááju mieđettij 10 500 euro išeruuđâ kirje várás.
Movsháá historjá lii uási meid Mattus-Kumpunen historjá já tondiet tuveh láá kirječällei teháliih. Suu äijih šoodâi Movsháá stuárráb tuuveest, mon suu maddâreh huksejii. Sun tuđhâškuođij tuuvij historjá vittâ ive tassaaš já čaalij fáádást eereeb iärrán Anarâš-loostân.
Kirjeest Mattus-Kumpunen haalijd muštâliđ vijđásubbooht, maht tuuvij historjá lohtâs ubâ Aanaar kuávlu historján.
– Magareh láá lamaš toh almoneh, moh láá vaiguttâm taan kuávlu ulmui elimân. Já halijdâm váhá sárguđ kovosijd, ko maaŋgâid aašijd lii vaigâd iberdiđ tuše teevstâ peht, sun muštâl.
Mattus-Kumpunen vuosmuš kirje kolgâččij leđe puáttee ive vaalmâš. Anarâškielâ servi kuástid kirje.
Suomâ kulttuurruttârááju Lappi uásáduv išeruuđâin tuárjuh eromâšávt Laapi kuávlun lohtâseijee tutkâm- já kulttuurprojektijd. Išeruuđâ ožžuu meid eres säämi tuáimeeh. Eereeb iärrán aanaarlâš náguskirjetotkee Pirita Näkkäläjärvi uážui 28 000 euro išeruuđâ náguskirjetutkâmušân.
Luuvâ meid: Museoeemeed Ulpu Mattus-Kumpunen livđoo, tuáijoo, sárgu já muštâl mainâsijd kuosijd