Sámediggelágas dolvojuvvo evttohus riikabeivviide dán jagi loahpa rádjai. Ášši čielgá aiddo almmustahtton ráđđehusprográmmas. Áššis muitalii vuosttamužžan Helsingin Sanomat.
Sámediggelága ođasmahttin gopmánii giđđat vuođđoláhkaváljagoddái. Vuođđoláhkaváljagoddi gávnnahii, ahte dat ii oaččo smiehttamušas sámediggelágas válmmašin, ja ášši gieđahallan mearriduvvui heaittihuvvot.
Láhka gopmánii jienastanvuoigatvuođa meroštallamii ja eananvuoigatvuođaide.
Ráđđehusprográmmii lea čállon, ahte evttohus dahkkojuvvo kansliijahoavda Pekka Timonen doaibmagotti barggu vuođul ovttasbarggus Sámedikkiin. Evttohusa mielde Sámedikki válgalogahallamii beassama eavttut ođasmahttojuvvojit. Seammás nannejuvvošii sápmelaččaide riekti ieš meroštallat, geat leat sápmelaččat.
Timosa doaibmagotti evttohus válmmaštuvai jagis 2021 . Maiddái ovddit sámediggeláhkaevttohus lei dahkkon dan vuođul. Suoma ráđđehus ii ollen doalvut evttohusa riikabeivviid gieđahallamii dán giđa ja evttohus gopmánii vuođđoláhkaváljagoddái.
Ráđđehusprográmmas leat maiddái eará girjemat, mat gusket sápmelaččaide
Ođđa ráđđehus maid linnje prográmmasttis, ahte duohtavuođa- ja soabadankommišuvnna barggu jotket jagi 2025 lohppii.
Dasa lassin ulbmil lea nannet vehádatgielaid, dego sámegiela, gárjilgiela, románagiela ja seavagiela sajádaga. Ráđđehus áigu maiddái sihkkarastit guovttegielat ja sámegielat gielddaid doaibmaneavttuid gielddapolitihkas, bidjat návccaid ohcci nuoraidbargui ja nuoraid bargobájiide ja servvodaga olggobeallái báhcima easttadeapmin maiddái sámegillii.
Dievasmahtton 16.6. dii. 15.54: Maiddái Yle lea oaidnán ráđđehusprográmma hápmosa.
Dievasmahtton dii. 16.30 sápmelaččaide guoski girjemiiguin.
Beaividuvvon dii 17.16: Prográmmahápmosa girjemat ledje mielde aiddo almmustuvvan ráđđehusprográmmas.