Suoma ođđa ráđđehusprográmmas lohpidit ođasmahttit sámediggelága ja láhkaevttohusa figget doalvut riikabeivviide jo dán jagi bealde. Sámediggeláhkaevttohus dahkkojuvvo kansliijahoavda Pekka Timosa doaibmagotti barggu vuođul ovttasráđiid Sámedikkiin, čuožžu ođđa ráđđehusprográmmas.
– Dát lea olmmošriektedahku, celkkii Anna-Maja Henriksson ráđđehusa dieđihandilálašvuođas.
Sámediggi jienastii sámediggelága ođasmahttima beales diibmá skábmamánus jienaiguin 15-3. Sámedikkis eatnašat illuditge sámediggelága ođasmahttima lohpádusas.
Juuso ja Koivisto leaba duđavaččat ráđđehusprográmmii
Sámedikki ságadoalli Tuomas Aslak Juuso mielas ođđa ráđđehusprográmma lea máŋggabealat. Son bargagoahtá buriin mielain ođđa ráđđehusain sámediggelága ovdii.
– Dat lea guhká leamašan Sámedikki sávaldahkan. Dál lea oalle dárkilis girjen ja sáhka lea dán jagi áigge vel doalvut ođđa láhkaevttohusa riikkabeivviide, illuda Juuso.
Maid Sámedikki vuosttaš várreságadoalli Anni Koivisto illuda ráđđehusprográmma sisdoalus sámediggelága ovddideami ja sámiid duohtavuođa- ja soabadankommišuvnna barggu joatkima ektui.
Ođđa ráđđehus linnje, ahte duohtavuođa- ja soabadankommišuvnna barggu jotket jagi 2025 lohppii. Dan haga kommišuvnna bargu nogašii dán jagi loahpas.
– Sávan ahte dát dárkkuha, ahte kommišuvdna beassá dan dehálaš barggu čađahit lohppii ja dikšut albmaláhkai, sávvá Koivisto.
Sámediggeáirras Kari Kyrö lei okta dan golbmasis geat eai háliidan ovddidit lága skábmamánus. Su mielas ráđđehusprográmmas leat máŋga buori ášši, ja okta dain lea sámediggeláhkaođastus.
– Go beare buot sámiid jietna gullo. Timosa doaibmagotti evttohusain vujiimet jo oktii seaidnái, in dieđe gánnehago dakkára joatkit, Kyrö dadjá.
Buot Sámedikki evttohusat eai šaddan prográmmii
Tuomas Aslak Juuso livččii sávvan eambbo ja viidásut girjemiid maiddái sámeoahpahusas ja sámiid kultuvrralaš bargguin, árbevirolaš ealáhusain sihke sosiála- ja dearvvašvuođabálvalusain. Buot Sámedikki evttohusat eai šaddan ođđa ráđđehusprográmmii.
– Dat báhcet dál iešguđetge ministeriijaid duohkái, ahte mo bastit ovddidit áššiid singuin, Juuso lohká.
Anni Koivisto muitala maiddái, ahte ráđđehusprográmmas leat merkejumit, maid vuođul sámiid vuoigatvuođaid livčče vejolaš ovddidit. Son namuha ovdamearkka dihtii skuvlensuorggi.
Ráđđehusprográmmas namuhit maiddái earret eará unnitlogugielaid dili nannema ja sámegielat gielddaid doaibmaeavttuid sihkkarastima gieldapolitihkas. Kari Kyrö mielas dat lea buorre ášši.
– Sámegielaid ovddideapmái oažžut ruhtadeami ja dat lea riekta. Dat lea okta dain buoremus áššiin, maid Sámediggi lea ožžon áigái.
