Constellation-ráiddu olgoriikalaš buvttadanfitnodat lea ožžon veahkaválddálaš áitagiid sosiálamediaid bokte dan maŋŋá, go ođđasat mávssekeahtes miljonvelggiin beaggigohte ođđasiin.
Buvttadanfitnodat Turbine Studios ovddasteaddji Ian Thomson muitala Yle Sápmái, ahte áitagat leat boahtán maiddái šleađgaboasttain.
– Mii áigut dahkat rihkusalmmuhusaid sis, geat leat áitán min, dadjá Thomson.
Yle Sápmi lea oaidnán oasi dain áitagiin.
Riikkaidgaskasaš Constellation-ráiddu govvemiid nohkama maŋŋá báhcán velggiin lea muitaluvvon ođđasiin viidát. Suopmelaš fitnodagat šadde vuordit logiid ja joba čuđiid duháhiid euroid velggiid máksima mánotbajiid. Sullii 40 fitnodatdoalli vurde fidnet mávssuid oktiibuot badjel miljon euro ovddas. Dáin logi ledje lappilaš fitnodagat.
Buvttadanfitnodagat sivahallet nubbi nuppi
Árat dán vahkus muitaleimmet, ahte buvttadanfitnodat lea máksán stuorimus oasi miljonvelggiinis suopmelaš fitnodagaide. Áššis leamašan máŋggat mohkit ja oassebealit leat sivahan nubbi nuppi.
Árabuš velggiin sivahallui olgoriikalaš buvttadanfitnodat Turbine Studios. Buvttadanfitnodat goit sivahii gieskat konkursii šaddan suopmelaš ovttasbargofitnodat Film Service Finland fuones ruhtadoalus. Film Service Finland fuolahii ráiddu buvttadeamis Suomas.
Film Service Finland ovddeš buvttadeaddji Jupe Louhelainen mielas áššis leat máŋggat oainnut. Son dadjá, ahte buvttadanfitnodat ii leat čujuhan čielga listtu riidduvuloš goluin ja dál sivaha suopmelaš ovttasbargofitnodaga.
Reastaluvvama oktavuođas doaimmahuvvon báhpáriid mielde suopmelaš buvttadanfitnodat Film Service Finland vuordá ain, ahte olgoriikalaš buvttadanfitnodat Turbine Studios máksá sidjiide velggiidis, muitala konkursabeassedivššár Kristiina Kaarte.
Kaarte dieđuid mielde buvttadanfitnodat lea máksán velggiid njuolga velggolaččaide, muhto sis eai leat dárkilut dieđut mávssuin.
”Sáhttá váikkuhit riikkaidgaskasaš buvttademiide Suomas”
Suopma ja eandalitge davimus Sápmi leat maŋemuš jagiid geasuhan máŋggaid riikkaidgaskasaš filbmaprošeavttaid ja produkšuvnnaid. Constellation-ráiddu leat govven viđa riikkas ja ráidu lea stuorámus buvttadeapmi, man goassege leat govven belohahkii Suomas.
Sámis govvemiidda oassálaste 220 filbmamáilmmi ámmátolbmo. Govvemiin báikkálaš fitnodagat ávkašuvve 1,7 miljon euroin.
Buvttadanfitnodat Turbine Studios ovddasteaddji Ian Thomson háliida deattuhit, ahte govvenvásáhus Suomas lei fiinnis, vaikko čorgemuš leamašange maŋŋel olu. Thomson jáhkká, ahte moivi ja áitagat sáhttet váikkuhit riikkaidgaskasaš buvttademiide Suomas.
– Mii sávvat, ahte dát ii vahágahte Suoma riikkaidgaskasaš profiilla. Mii diehtit, ahte Suomas leat olu čeahpes filbma- ja tv-suorggi olbmot, geat buvttadit máilmmidási buvttademiid minguin ja eará riikkaidgaskasaš doaibmiiguin, dadjá Thomson.