Aanaarlâš Heli Aikio aalgât uđđâivemáánu aalgâst anarâškielâlii čällen sämmilij tuotâvuotâ- já sovâdâttâmkomissiost. Komissiost láá lamaš vädisvuođah kavnâđ uđđâ anarâškielâlii pargee, tast maŋa ko oovdeb pargee jooskâi.
Aikio paargon lii ovdâmerkkân orniđ kulâmijd, mutâ sun lii táárbu mield fáárust kulâmijn. Sun puáhtá leđe fáárust kulâmijn, jis olmooš pivdá suu fáárun.
– Kale mun lam iberdâm, et tot lii tehálâš peessâđ muštâliđ jieijâs kielân toid aašijd.
Meid komissiost aneh tehálâžžân tom, ete čäällimkoddeest lii máttu jyehi sämikielân, muštâl váldučällee Ulla Aikio-Puoskari.
Aikio vuárdá, ete piäsá kuullâđ ulmui feerimijd
Heli Aikio vuárdá enâmustáá et piäsá porgâđ pargoid, savâstâllâđ ulmuigijn já puáhtá máhđulávt leđe iššeen.
– Mun lam lamaš perustum aldahistorjás. Muu luándu lii tieggáár, et mun suogârdâlâm uáli ennuv aašijd, te mun uáinám, et komissio pargoost lii váhá sullâsâš toimâkove.
Sun lii ráhtádâttâm toos, ete pargo sáttá leđe meid lussâd já máhđulávt ulmuin láá lusis-uv feeriimeh. Sun kuittâg vuárdá, ete piäsá kuullâđ mii lii tábáhtum já magareh feeriimeh ulmuin láá.
Ovdil ive mulsâšume sämmilij tuotâvuotâ- já sovâdâttâmkomissio lii čođâldittám kulâmijd jo ohtsis suullân 120.
Ive 2024 aalgâst komissio ohjelmist lii tilálâšvuođâi ornim já kulâmij joton piejâm Kärigâsnjaargâst, Hettaast já Kärisavonist.