Ođđajagimánus Skábmagovat-festivála lágiduvvo 25. geardde. Festivála dáiddalaš jođiheaddji Jorma Lehtola doallá fuola, ahte dohko ii dárbbaš dušše boahtit geahčadit almmi násttiid, daningo prográmmas leat maiddái filbmasuorggi násttiid buvttadusat dego earret eará Katja Gauriloff, Suvi West ja Sara Margrethe Oskal filmmat.
– Mis leat dál hárvenaš olu guhkes sápmelaš ealligovat, orro ahte diet bealli lea dál vuolgán albmaláhkai johtui, árvala Lehtola.
Lehtola deattuha maid erenoamážit čájáhusaid, mat gieđahallet Kanáda ásodatskuvllaid birrasiin gávdnon mánáid liikkaid. Son čalmmustahttá, ahte dákkár ásodatskuvlasystema váttisvuođat leat dávjá álgoálbmogiid ovttastahtti fáddá máŋgga riikkas.
Prográmmas lea ovdamearkka dihte Bones of Crows -ealligovva, man neavttár Gail Maurice maid lea báikki alde festiválaid áigge. Maurice iežas ealligovva Rosie čájehuvvo maiddái Skábmagovain.
Fállun leat goittotge maid veháš geahppasut filmmat. Lehtola máinnaša ovdamearkan ráhkisvuođafilmma Inky Pinky Ponky, mii laktása arvedávgeáššiide.
– Dađi bahábut gullá álo duollet dálle, ahte Skábmagovain ledje vuot nu losses filmmat, de dál boahtá maid vehá geahppasut ášši, muhto maid hui miellagiddevaš. Vaikko dat gieđahalletge váttis áššiid, dat lea aisttan dákkár buori miela filmmat.
Skábmagovat lágiduvvojit Anáris 25.1.–28.1 ja gáiddusin 29.1.-6.2. Dárkilut prográmma gávnnat Skábmagovaid neahttasiiddus.
