Suomas válljejit dán dálvvi ođđa presideantta. Presideanttaválggaid vuosttas válga lágiduvvo ođđajagimánu loahpas, ja evttohasat leat oktiibuot ovcci.
Yle Sápmi jearai davi olbmuin, manin sin mielas lea dehálaš jienastit presideanttaválggain.
Jussá Seurujärvi Bárttehis lohká jienasteami leat dehálaš danin, go presideanttas galgá leat oktavuohta maiddái sámiiguin.
– Son galgá geahččat boahttevuhtii, muhto maiddái muitit dan historjjá makkár leamašan.
Anárlaš Kaisa-Maria Poikela fas dadjá, ahte go sámit orrot Suoma stáhta vuolde, danin gánneha maiddái jienastit Suoma stáhta presideantta.
– Gánneha vel smiehtastit, gean jienasta. Dušše dainna ovttain jienain sáhttá váikkuhit dasa, gii min vuolgá ovddastit máilbmái.
Jukka Vuorela-Morottaja Anáris fas sávvá, ahte livččii dakkár presideanta gii áddešii davi olbmuid.
– Presideanttaválggain juohke ovtta jietna lea seammaárvosaš sihke Anáris ja Helssegis, go eai leat válgabiret eaige gorrelogut.
Ovdajienasteapmi álgá gaskavahku
Dáid válggain presideantan figget Li Andersson (Gurut), Olli Rehn (Guovddáš), Harry Harkimo (Liik.), Jussi Halla-aho (VS), Jutta Urpilainen (SD), Mika Aaltola (válljenovttastus) Alexander Stubb (Olgeš), Sari Essayah (KD) ja Pekka Haavisto (válljenovttastus).
Vuosttas válgabeaivi lea 28.1. Ovdajienasteapmi lágiduvvo Suomas 17.–23.1. ja olgoriikkas 17.–20.1. Jus gii nu evttohasain fidne badjel beali buot jienain, son válljejuvvo njuolga presideantan. Muđui lágiduvvo nubbi válga guovtti eanemus jienaid čohkken evttohasa gaskkas.
Vejolaš nubbi válga lágiduvvo sotnabeaivve 11.2. ja dan ovdajienasteapmi lágiduvvo Suomas 31.1.–6.2. ja olgoriikkas 31.1.–3.2.
Yle válgamašiinnas beasat iskat guđemuš presideantaevttohas lea eanemus ovttaoaivilis duinna.