Gaskavahku álgán Lux Helsinki -čuovgadáiddadáhpáhussii ledje čoahkkanan olu geahččit. Senáhtatoarggas stáhtaráđi šloahta seaidnái speadjalastui maiddái garra ságastallama bohciidahttán govvadáiddár Katariina Souri govva, mii su oainnu mielde čájeha sámenissona.
Helssetlaš Arja Ahoniemi lei geahččamin Souri gova garra buollašis fuolakeahttá. Su mielas lea dehálaš ságastallat das, mii lea kultuvrralaš ávkkástallan ja makkár govvideami lea heivvolaš geavahit.
– Várra dát dál lea hui boaresáigásaš ja justa dat kultuvrralaš ávkkástallan. Kánske dan govvideami sáhtášii ođadit.
Gova mearridedje čájehit dáhpáhusas, muhto dasa leat lasihan sisdoallofuomášumi. Das čuožžu earret eará, ahte čájáhusas leat oasit main eamiálbmogat govviduvvojit stereotiippalaččat.
– Gal dat lea áibba ákkastallojuvvon, ahte manin gova čájehit. Ságastallama sáhttá dál joatkit, go olbmot leat oaidnán dan gova, ja hábmet iežas oainnu áššái, dadjá Ahoniemi.
Buohkat eai leat ovttaoaivilis Ahoniemiin. Espoolaš Heli Lehtonen ii ádde manin áššis šattai nu garra ságastallan. Su mielas Souri govat leat ivdnát ja fiidnát. Kaarina Lindqvist maid imaštallá ságastallama áššis.
– Dat leat dušše čuovgagovat. Eai dat duosa báze agibeaivái, Lindqvist dadjá.
Lux Helsinki lágiduvvo ođđajagimánu 3.–7. beaivve Helssega guovddážis. Geahča prográmma dáppe.
Divvojuvvon 4.1.2024 dii. 9.26 Lasihuvvon, ahte govva speadjalastui stáhtaráđi šloahta seaidnái.