Duojár Jouni S. Laiti dáiddaduojit leat oaidnimis bearjadaga rájes dáládáidaga museas Kiasmas Helssegis. Kiasma lea oastán Laitis njeallje dáiddabarggu, ja golbma dain leat dál oassin Kuin kotonaan -čájáhusas.
Čájáhusas leat mielde badjel 20 dáiddára dáiddaduojit ja dat lea rabas boahtte jagi beallái, 12.1.2025 rádjai.
Laiti muitala, ahte su bargguid vuođđun lea duodji.
– Ii galgga vuolgit geahččat gal duoji, go dalle sáhttá beahttašuvvat. Dat lea dakkár dáiddalaš vuohki ovdanbuktit dan duoji. Mus dan duoji sisdoalu muitalus čuovvu dan mu dáiddabarggu ja das geahčči sáhttá dasto bargat dulkomiid iežas vuolggasaji vuođul, muitala Laiti.
Kiasmas lea oaidninláhkái earret eará guksi, man čađa manná ruston spihkár.
– Dat orru leamen dakkár bargu mii boktá beroštumi. Dan lei hui váttis álggos ráhkadit munnje. Leanhan mun ráhkadan das máŋga earáge veršuvnna seamma fáttás, čilge Laiti.
Kuin kotonaan -čájáhus gieđahallá ruovttu ja gullevašvuođa dáidaga bokte. Čájáhusas lea mielde maiddái nubbi sámedáiddár, go oaidninláhkái čájáhusas lea Ruoŧa beale sápmelačča Olof Marsja dáidda.
Lea beassan veahkkeruđain ráfis duddjot
Laiti oaččui diibmá Suoma kulturruhtarádjosis 21 000 euro sturrosaš veahkkeruđa dáiddalaš barggu várás. Sutnje mearkkaša olu, ahte lea válljejuvvon beassat iežas dáiddalaš bargguid bokte Kiasma čájáhussii.
Laiti barggut leat oaidninláhkai giđa áigge maiddái Roavenjárgga gávpoga dáiddamuseas Korundis. Bassi muoraid vuovdi -čájáhus rahpasa 1.3.2024. Dat lea stuorát čájáhus, mas lea mielde maiddái Laiti guoibmi Kirsi Paltto duodjedáidda.
– Dohko mun lean duddjon olles geasi ja čavčča. Doppe leat oaidnimis veháš stuorátge barggut, dakkár installašuvnnat, eai dušše smávva duoji mahtosaš barggut, muitala Jouni S. Laiti.
