Mannan bearjadaga ledje Ohcejogas čoahkkanan gudnejahttit nástediehtti Ándaras Kitti. Ássanbálvalandálu ássit ledje beassan Lappi universiteahta dáiddabajásgeassiid vehkiin duddjot iežaset nástealmmi.
Ándaras Kitti riegadeamis lea dál golihan 180 jagi, son elii 1844-1926. Son lei beroštuvvan dutkat nástealmmi, dan mielde son dádjadii maid boazomeahcis.
Viljo Hánsa Vuolab ii muitte ádjás áhčči, muhto su áddjá lei oahppan nástealmmi dieđuid áhčistis ja sirddii daid dasto iežas mánáide ja áddjubiidda.
– Dat oahpahii muge násttiid mielde eallit. Mu áddjá Ándaras-Hánsa lei máilmmi dádjilis olmmoš.
Ohcejoga Ursa -nástedutkansearvvi ovdaolmmoš Juhani Harjunharja lea čohkken historihkká Ándaras Kittis. Harjunharja mielas Kitti lei hui erenomaš ja čeahpes olmmoš.
– Son hutkkai iežas eallima áigge juoidá dakkára mii vurkejuvvui historjái. Nástediehtaga guovddášášši lei Nieidagearret-nástejoavku (virggálaš namma plejadit, su. seulaset).
Piera Niillas Paltto lei okta ássanbálvalandálu ássiin, guhte beasai duddjot iežas nástti. Su mielas lea somá go dákkár dáhpáhusaid leat sidjiide ordnen.
– Iihan dáppe lean mihkkige. Movttiidedje olbmot dáppe, dadjá Paltto.
