Suullân 500 sárnoo anarâškielâ kirjálâšvuođâst mana pyerebeht ko kuássin ovdil. Čäällimprojektij já jurgâlmij keežild lii almostum ennuv uđđâ luhâmuš párnáid, nuoráid já meid rävisulmuid.
Luhâmuš ij lekken tállán nuhâmin. Ubâ paje jurgâleh já toimâtteh uđđâ kiirjijd, ovdâmerkkân nuorâi novelleh láá puátimin, muštâl anarâškielâ seervi saavâjođetteijee Marja-Liisa Olthuis.
– Mij lep haalijdmin finniđ párnáid mainâskirje. Eidu uánihis párnái mainâseh onnuuččii vala-uv, jis kiinii haalijd čäälliđ, sun lasseed.
”Mun halijdim čäälliđ anarâškielân, et párnáin ličij luhâmuš”
Aanaarlâš Henna Tervaniemi räähist čäälliđ. Jo pärnin sun nievdâi kirje čälimist, mutâ niävdus vájáldui.
Puoh muttui talle ko sun oopâi anarâškielâ já rähisvuotâ čälimân kavnui vuod. Sust láá pääihist anarâškielâliih párnááh, mii movtáskit suu čäälliđ párnái mainâsijd.
– Mun halijdim čäälliđ anarâškielân, et párnáin ličij luhâmuš.
Sust láá tääl pargo vyelni párnái elleemainâseh já ohtâ avalâš proojeekt.
– Tot lii rävisulmui maainâs. Čäällim lii pištám jo maaŋgâ ive já amahân vala pištá-uv, sun povvust.
”Ij lah innig taggaar tile, et puoh čalluuh liččii oovtâ ulmuu tyehin”
Anarâškielâ jurgâleijeeh já čälleeh láá onnáá peeivi, mutâ ruttâdem uuccâm poorgât Anarâškielâ seervi. Marja-Liisa Olthuis uáiná, ete anarâškielâ kirjálâšvuođâ kolleäigi lii vala ovdiibeln.
– Mij lep monâmin pyereeb kuávlun. Mist ij lah innig taggaar tile, et puoh čalluuh liččii oovtâ ulmuu tyehin.
Puoh kielâ sárnooh iä vala onnáá peeivigin määti čäälliđ sämikielân. Olthuis uáiná taan čuolmâ čuávdim tehálâžžân.
– Čäällimškovliittâs ulmuid kiäh halijdiččii čäälliđ sämikielân, mut kiäh iä jieijâs mielâst lah oppâm čäälliđ.
Meid Tervaniemi mielâst anarâškielâ kirjálâšvuotâ tarbâšiččii eenâb čälleid, vâi šodâččii maaŋgâlágáneh čalluuh.
Tuorâstuv Säämi virtuaalkirjerááju uárnee neetist Webinaar, mast anarâškielâ kirjálâšvuođâ syergi ulmuuh muštâleh eereeb iärásij kirjálâšvuođâ jurgâlmist, Anarâškielâ seervi kuástidemtooimâst já anarâškielâ kirjekielâ huksiimist. Henna Tervaniemi lii ohtâ tain ulmuin.