Vealaheapmi ii mearkkašahtti láhkai boahtán ovdan alimus hálddahusrievtti (AHR) maŋimuš čovdosiin Sámedikki válgalogahallanáššis. Dát čielgá vástádusas, man AHR lea addán ovttaveardásašvuođaáittardeaddji diehtobivdagii.
Sámedikki válgalávdegoddi ii merken jagi 2023 válgalogahallamii buot daid olbmuid, geaid AHR lei gohčon dohko lasihit Sámedikki oainnu vuostá. AHR attii njukčamánus čovdosiid válgalogahallamis dahkkon váidagiidda ja mearridii, ahte válgalogahallamii galgá merket 65 olbmo ja válggaid ferte lágidit ođđasit, danne go dát olbmot eai beassan jienastit dahje álgit evttohassan čavčča válggain.
Ovttaveardásašvuođaáittardeaddji Kristina Stenman muitala Yle Sápmái, sii háliidedje čielggadit, leigo AHR maŋimuš čovdosiin boahtán ovdan dat, ahte gažaldagas livččii vealaheapmi daid olbmuid vuostá, geat eai lean váldon mielde válgalogahallamii.
– Sin vástádus lei, ahte mange váidagis vealaheapmi ii boahtán ovdan, muitala Stenman.
Ovttaveardásašvuođaáittardeaddji deattuha, ahte AHR lea čoavdán váidagiid sámediggelága vuođul.
Sámedikki ságadoalli Pirita Näkkäläjärvi oaivvilda Sámedikki dieđáhusas, ahte AHR vástádus ovttaveardásašvuođaáittardeaddji diehtobivdagii dárkkuha dan, ahte Sámedikki válgalávdegoddi ja stivra eai vealahan váidiid.
– Dat vástida min iežamet áddejumi das, ahte čuoččuhusaide Sámedikki válgalávdegotti dahje stivrra hárjehan vealaheamis eai leat ákkat, dadjá Näkkäläjärvi.