Sámiráđđi ii oaččo boahtte jagi stáhtadoarjaga Suoma olgoriikkaministeriijas. Jagi 2025 bušeahttaárvalusa mielde olgoriikkaministeriija čuohpasta hálddahussuorggi stáhtaruhtadoarjagiid álbmotorganisašuvnnaide oalát eret.
Dán jahkái olgoriikkaministeriija juolludii stáhtaruhtadoarjagiid álbmotorganisašuvnnaide oktiibuot 1 063 000 euro, muhto boahtte jagi bušeahtas doarjja sihkastuvvo oalát eret. Olgoriikkaministeriija gártá seastit oktiibuot 116 miljovnna euro.
Dát čuohcá garrasit Sámiráđđái, go dainna ruđain leat bastán bargat árktalaš- ja birasáššiiguin Árktalaš ráđis, muitala Sámiráđi presideanta Áslat Holmberg. Dasa lassin dat váikkuha Sámiráđi olmmošvuoigatvuođabargui.
– Dát lea dieđus váivves sáhka. Orru, ahte dat eai leat atnimin árvvus dan barggu maid mii siviilaservodagas bargat olmmošvuoigatvuođaid, birasáššiid ja árbedieđuid ektui, dadjá Holmberg.
Sámiráđđi lea ožžon máŋgalot duhát euro sturrosaš doarjaga jeavddálaččat olgoministeriijas, ja dainna ruđain leat bastán bálkkáhit bargiid. Dán jagi Sámiráđđi fidnii stáhtadoarjaga 58 000 euro.
Sámiráđđi oaččui dieđu vejolaš seastimiiin juo miessemánus. Holmberg ii vuos dieđe, gártetgo heaittihit muhtin doaimmaid oalát ruhtadeami nohkama olis. Sámiráđđi áigu iskat gávdnat eará molssaeavttuid ruhtadeapmái.
– Mii dieđus šaddat gávdnat dan ruđa eará sajis. Dat buktá dárbbu ohcat ruhtadeami lasi, dadjá Áslat Holmberg.