Ijahis idjii bohte 3400 báikki ala návddašit livemusihkas ja festiváladovddus. Govva: Vesa Toppari / Yle
Xia Torikka
Mannan vahkuloahpa ordnejuvvon Ijahis idja -festivála geasuhii dán jagi buorebut go diibmá. Festiválas ledje oktiibuot 3 400 galledeaddji, mii lei 100 galledeaddji eambo go diibmá.
Maiddái festiválas sáddejuvvon njuolggasátta beroštahtii olbmuid neahtas. Dan gehčče 5 400 olbmo, mii lea beali eambo go diibmá.
Festiválas lei ávvujahki, go dat devddii 20 jagi.
Festiválas loaiddestedje dán jagi earret eará Mari Boine, Lávre, Tundra Electro, DJ Ailo ja DJ Idja, Kevin Boine, Niillas Holmberg, Ánnámáret, Rávggon, sihke Ailu Valle ja Amoc.
Dá oainnat vel govaid festiválas lávvardaga.
Guovdageidnolaš Ánte Máhtte Eira lei vuosttas háve Ijahis ijas. Son lovttii festiválas nu bures, ahte áigu sihkkarit boahtit nuppes maid Ijahis idjii. Govva: Vesa Toppari / Yle
Njuorggánlaš Ántte Issát Länsmanis lei hohppos vahkuloahppa. Son juoiggai festivála mánáidbeaivvis ja maiddái lávvardaga Talent Stages, ja oassálasttii maid njoarostangilvui. Govva: Vesa Toppari / Yle
Mari Boine ovdanbuvttii sihke boarrasut hittaid muhto maiddái ođđa luđiid ja lávlagiid, mat leat su ođđa skearrus. Govva: Vesa Toppari / Yle
Matti Morottaja, Kuobžâ Saammâl Matti livđui Ijahis ija árbevirolaš luohtekonsearttas. Govva: Vesa Toppari / Yle
Niillas Holmberg signere iežas ođđa romána ”Goatnelle”. Son almmustahtii Ijahis ijas girjji lassin maiddái ”Luođik”-nammasaš luohteduoji. Govva: Vesa Toppari / Yle
Talent Stage -oasis ođđa aristtat besse lávddi ala. Lávddi alde Laura Tapiola. Gitárra čuojahii Jouna Raudasoja. Govva: Vesa Toppari / Yle
KONES-joavku loaiddastii Talent Stages. Lávlu Kaisla Suominen mielas dakkár konseapta lea hui dehálaš nuorra musihkkáriidda. Govva: Vesa Toppari / Yle
Musihka lassin Ijahis ijas besse sihke mánát, nissonat ja dievddut čájehit dáiddudeaset njoarostangilvvus. Govva: Vesa Toppari / Yle
Anna Lumikivi leu'ddii árbevirolaš luohtekonsearttas. Govva: Vesa Toppari / Yle
Anárlaš Anna Pyykkö atná Ijahis ija dego ruoktofestiválan. Govva: Vesa Toppari / Yle
Ijahis ija eamiálbmotguossi Ed Littlefield bođii Aláskkas. Son gullá Lingit-eamiálbmogii. Govva: Vesa Toppari / Yle
Nils-Heikki Paltto lea bidjan luođi Ijahis idjii. Govva: Vesa Toppari / Yle
”Bummolullu”hersko lei bivnnut. Govva: Vesa Toppari / Yle
Lars Heaika Blind Nearvvas eret juoiggai árbevirolaš luohtekonsearttas. Govva: Vesa Toppari / Yle
Festiválas beasai maid duodjemárkaniin váccašit. Govva: Vesa Toppari / Yle
Tuuni Partti mátkkošta juohke jagi Helssegis iežas ruovttuguvlui Ijahis ija dihte. Govva: Vesa Toppari / Yle
Ijahis ija ovdanbuktimat geasuhedje buot ahkásaččaid, unna mánás gitta vuorrasut olbmuide. Govva: Vesa Toppari / Yle
Lasi govaid bearjadaga festiválagallededdjiin ja sin stiillain oainnat dás.
