Suoma Sámi Nuorat ja suopmelaš biras- ja olmmošvuoigatvuohtaorganisašvunnat oidnet, ahte stáhtaráđđi rihkku Suoma dálkkádatlága, go Suoma ulbmil leat čitnaneutrála jagis 2035 ja maiddái EU dálkkádatgeatnegasvuođat eai oro ollašuvvame.
Dan dihtii Suoma Sámi Nuorat (SSN), Suoma luonddusuodjalanlihttu, Greenpeace Norden, Amnesty international Suoma ossodat, Ilmastoisovanhemmat ja Luontoliitto leat váidán Suoma vánis dálkkádatdoaimmaid Suoma Alimus hálddahusriektái.
– Dat lea dahkkon namalassii danin, ahte Suoma ráđđehus rihkku dan Suoma ođđa dálkkádatlága, ja dat ii leat dahkan doarvái daid doaimmaid dálkkádatrievdama ja dálkkádaga báhkkaneami eastimii, lohká Suoma Sámi Nuorat -searvvi ságadoalli Teija Kaartokallio.
Searvvit oidnet, ahte Suopma ii boađe ollašuhttit dálkkádatlága ulbmiliid ja Orpo ráđđehus ii leat doaibmagoahtán dálkkádatlága mielde daid ovdii.
– Leat vuordán stáhtaráđis doaimmaid čitnanjieluid gádjumii jo badjel guokte jagi. Stáhtaráđđi lea ožžon valjit čielggadusaid ja statistihkkadieđuid, maid vuođul mearrádusaid lassedoaimmain dálkkádatmihttomeriid fáhtema ovdii livččii sáhttán dahkat, lohká Suoma luonddusuodjalanlihtu dálkkádatáššedovdi Hanna Aho.
Searvvit: Sámiid, mánáid ja nuoraid vuoigatvuođat áitojuvvon
Searvvit gáibidit váidagis, ahte stáhtaráđđi bargagoahtá jođánit dan guvlui, ahte dálkkádatlága ulbmilat duohtandahkkojuvvojit ja vuođđo- ja olmmošrievttit dorvvastuvvojit. Kaartokallio muitala, ahte SSN vulggii mielde váidaga dahkamii, go dálkkádatrievdan ja dálkkádaga bahkaneapmi váikkuhit earenomážit árktalaš guovllu lundui ja dan bokte earenomáš garrasit sámiide.
– Luondu lea goittot sámekultuvrra, giela, ealáhusaid ja buot daid vuođđun. Danin mii doallat dehálažžan oassálastit dása, go min searvvi bargun lea ovddidit ja bearráigeahččat dan, ahte sámenuoraid rievttit ollašuvvet.
Searvvit deattuhit, ahte stáhtaráđi vátna dálkkádatdoaimmat áitet sámiid lassin maid mánáid ja nuoraid vuoigatvuođaid ollašuvvama.
Sámiid rievttit leat sierra máinnašuvvon Suoma dálkkadatlágas sihke rivttiid, giela ja kultuvrra dorvvasteami muhto maiddái dálkkádatpanela bokte.
Luonddusuodjalanlihttu ja Greenpeace leat árat váidán stáhtaráđi dálkkádatdoaimmaid Alimus hálddahusriektái. Dalle AHR mearridii leat dutkkakeahttá ášši go oinnii, ahte dálkkádatláhka ii leamašan doarvái guhká fámus.