Sámedikki boahtte jagi ruhtadeapmi ii geahppánge nu olu, go maid ovddalgihtii ledje vuordán ja ballan. Dán vahkus dárkkálmuhtton stáhta bušeahttaevttohusa mielde Sámedikki kulturiešmearrideapmái oaivvilduvvon ruhtadeamis čuohpastuvvo dušše 193 000 euro.
Seastindárbu unnui dán vahku bušeahttaságastallamiin measta goalmmádassii álgoálgosaš supmis. Vel borgemánu álggus stáhta áiggui geahpedit Sámedikki ruhtadeamis 568 000 euro.
Dan ektui ođđa čuohppansubmi ii oro šat nu vearrái, dadjá Sámedikki ságadoalli Pirita Näkkäläjärvi.
– Gal dát lea buorre ođas. Dieđusge mii gártat seastit ja dietge lea stuorra submi, muhto iihan dat leat seamma olu go dalle álgoálggus lei muitaluvvon. Ii sáhte leat go duđavaš ja gal dát geahppuda olu, go mii smiehttat ja plánet boahtte jagi, dadjá Näkkäläjärvi.
Kulturiešmearrideapmái oaivvilduvvon ruhtadeami juolluda riekteministeriija ja dán jagi mearreruhta leamašan 4,968 miljon euro. Sámedikki birrasiid 10 miljovnna sturrosaš bušeahtas riekteministeriija ruhtadan oassi leage stuoris. Boahtte jagi bušeahtas kulturiešmearrideapmái čujuhuvvo 4,775 miljon euro.
Váikkuhanbargu buvttii bohtosiid
Maŋemuš mánu áigge Sámediggi lea garrasit geahččalan váikkuhit ruhtadeapmái ja sátnejođiheaddjit leatge viššalit johtán Helssegis deaivamin ministariid, riikabeaiáirasiid ja mearrideaddjiid. Maiddái eará sámedikkeáirasat ja bargit leat geahččalan aktiivvalaččat váikkuhit boahtte jagi bušehttii, giitala Näkkäläjärvi.
– Doaivvu mielde dat váikkuhii, ahte mii nákciimet čilget, man duođalaš dákkár badjel miljon beale čuohppan livččii leamašan Sámediggái.
Bušeahttaságastallamiin rokkastedjege vuoigatvuohtaministeriijai boahtte jahkái lassiruđaid, mainna de besset ruhtadit máŋggaid álbmotdoaibmiid ja álbmotservoša bargguid. Árvaluvvon čuohppamat unno mealgadit ja das ávkašuvai maiddái Sámediggi, jáhkká Näkkäläjärvi.
Vátna ruđain šaddet goit vel seastit
Sámediggi ii leat goit vel geargan gieđahallat seastimiid ođđa jorggáldagaid maŋŋá. Ulbmilin lea, ahte stivra čoahkkana jođánit suokkardallat ja árvvoštallat dili. Boahtte jagi Sámediggi ferte seastit politihkalaš doaimmas, čoahkkin- ja ráđđádallangoluin, válmmaštalliid bálkkáin, Sámi Giellagáldus ja hálddahusa, ekonomiija ja bargodearvvašvuođa goluin.
– Ii dat dieđusge somá leat. Sámediggi doaibmá juo dál vátna ruđaiguin ja guhká leamašan diená, ahte ii leat doarvái ruhta bargguide maid mii bargat. Dat čuohcá midjiide ja min bargguide boahtte jagi. Ii dat boađe álki leat, dadjá Pirita Näkkäläjärvi.
Čuovvovaččat jagi 2025 bušeahttaevttohus ovdanbuktojuvvo ja dohkkehuvvo stáhtaráđi oktasaščoahkkimis čakčamánu 23. beaivve. Riikkabeaivvit gieđahallá bušeahttaárvalusa juovlamánus.