Sámedikki stivra gieđahalai čoahkkimis Sámedikki seastindoaimmaid jahkái 2025 ođđa seastinsupmi vuođul.
Seastimat čuhcet hálddahusgoluide, bargoveahkahálddahusgoluide, ekonomiijahálddahusgoluide, davviriikkaid oktasaš sámegielaid áššedovdiorgánii Giellagáldui ja bargodearvvasvuođagoluide. Dan lassin seastinplána oassin stivra barggai várremiid sámekulturguovddáš Sajosa vuovdima ja Sámedikki doaimma ovddideapmái.
Suoma ráđđehusa stáhta bušeahttaevttohusas 2025 Sámedikki kulturiešráđđemii guoski geahpádus lea 193 000 euro. Borgemánus ruhtaministeriija evttohan čuohppan lei vel 568 000 euro.
– Dál mis gal miella geahpui, go seastimiid geažil mii eat dárbbaš eretcealkit Sámedikki bargiid, ságadoalli Pirita Näkkäläjärvi dadjá Sámedikki dieđáhusas.
Sámedikki stivra gieđahalai seastindoaimmaid čoahkkimisttis gaskavahku 18.9. Stivra dohkkehii rehkenastimiid seastindoaimmain jahkái 2025 dainna eavttuin, ahte stáhtaráđi stáhta bušeahttaevttohusas 2025, eai ovdanbukto nuppástusat Sámedikki almmolašdoarjagii. Bušeahttaevttohus almmustahtto 23.9.
Sámedikki ollesbušeahtta lea sullii 10 miljovnna euro. Kulturiešráđđemii čujuhuvvui dán jagi 4,968 miljovnna euro, go boahtte jagi bušeahtas dasa juolluduvvo 4,775 miljovnna euro.
Čuovvovaččat stáhta bušeahttaevttohus jahkái 2025 gieđahallo ruhtaváljagottis sihke stáhtaráđi oktasaščoahkkimis čakčamánu 23. beaivve. Bušeahtta dohkkehuvvo riikkabeivviin juovlamánus.
Sámedikki dievasčoahkkin dohkkeha Sámedikki doaibmaplána-bušeahta jahkái 2025 juovlamánu čoahkkimis.