Máŋggat boazodoallit gártet ain buncut eahpediđolašvuođain. Buot Sámi bálgosat eai leat beassan vel gárddástallat guhkes čavčča dihte ja máŋgasiin ii leat vel diehtuge biergogávppiin.
Báhčaveai bálgosa boazoisit Petri Hänninen muitala, ahte biergogávppiid dahkan leamaš nu váttis dán jagi, iige sis leat velge oasti.
– Mii leat álo vuovdán buot bohccuid biergofitnodagaide, mii eat leat ieža vuovdán njuolga kundariidda. Min dienas lea buot gitta biergogávppiin.
Njávdáma bálgosa boazoisit Wille Feodoroff dadjá, ahte dán čavčča eai leamaš olu molssaeavttut.
– Galhan mii leat behtton haddái, muhto go eai dat oastit leat nu valjis, de ferte duhtat dasa mii lea.
Váhčira bálgosa boazoisit Tuomas Semenoff bávkala njuolga makkár dilli lea.
– Mii eat leat duđavaččat biergogávppiid eavttuide, eatge hattiide.
Gieskat stuorámus biergofitnodat muitalii, ahte bohccobiergu lea báhcán vuovddekeahttá vuorkkáide ja bohccobierggu heittot johtu váikkuha muhtin veardde dasa, man olu fitnodagat sáhttet oastit bohccuid.
Oassi ráđđádallan earálágan soahpamuša go dábálaččat
Yle dieđuid mielde muhtin bálgosiidda lea fállojuvvon dakkár gávppit, mas boazodoalli oažžu jođánit 30 proseantta hattis ja loahpa fitnodat mávssášii easkka máŋgga mánotbaji geažes.
Muotkeduoddara bálggus ráđđádalai alcces nuppelágan soahpamuša, smávit oastima, muitala bálgosa boazoisit Janne Kitti.
– Stivrras leimmet ovtta oaivilis das, ahte ii dárbbaš jahkebeali vuordit ruđaid. Dien dáfus mii leat duđavaččat gávppiide. Mis lea uhcit kilohaddi go mannan jagi, muhto mii oažžut ruđa dakkaviđe, golmma vahkus, muitala Kitti.
Kitti muitala, ahte biergoindustriijas lea olu dáhpáhuvvan maŋimuš jagiid áigge. Ovdamearkka dihte Kylmänen, mii doaimmai Soađegilis, reastaluvai jagis 2022.
Sállevári bálgosa boazoisit Iisko-Henrik Näkkäläjärvi dadjá leat duđavaš biergogávppiide maid lea ráđđádallan dán čakčii, vaikko ráđđádallamat eai leamašge nu álkki.
– Buorit leat gávppit. Dat lea seamma sullasaš go diibmáge.
Näkkäläjärvi muitala, ahte sin bálgosis dahket biergogávppiid easkka dalle go lahkonit gárddástallamat. Dán čavčča goit gárddástallamat ja biergogávppit leat vatnan dange sivas go bohccot leamaš nu bieđgguid meahcis ahte daid ii leamaš álki čohkket.
Eanodagas dahket biergogávppiid siiddaid miel
Neakkela bálggus ii leat vel álgán gárddástallat, go dálkkit eai divtte. Sin bálgosis juohke siida ieš ráđđádallá biergogávppiin, muitala boazoisit Hannu Ranta. Siida, masa Ranta ieš gullá, ii leat vel vuolláičállán maidige.
– Lean jearahan oastis, leago sis miella oastit. Mii leat vuovdán Ruoŧa beallai.
Haddi ii leat dat mii okto mearrida dohko vuovdima.
– Ii doppe leat buoret haddi go Suomas muhto lea álkit, go dohko ii leat nu guhkes mátki, čilge Ranta.
Bálgosiid ovttastusa doaimmajođiheaddji Anne Ollila muitala, ahte dán čavčča vuvdojuvvon bohccuid gaskamearálaš kilohaddi lea leamašan guktuid beale 11 euro.