Ruoŧa beal duohtavuođakomišuvnna ságadoalli Kerstin Calissendorff lea almmuhan, ahte son heaitá luohttámušdoaimmas. Áššis čállá SVT Sápmi.
Calissendorff lohká earráneamis sivvan áiggi: kulturministeriija mielde Calissendorff vásihii, ahte sus ii leat doarvái áigi komišuvnna bargui.
Son álggii bargui diibmá cuoŋománus. Ruoŧa kulturministeriija lea dál ohcamin su sadjái ođđa ságadoalli.
Calissendorff áigu goittotge fuolahit virggi dassái go ođđa ságadoalli gávdno.
– Lea šállu go son earrána, son lea bargan buori barggu, dadjá jurista Eivind Torp komišuvnnas.
Maiddái sámeministtar Parisa Liljestrand šálloša ságadoalli earráneami.
– Ráđđehus lea dahkan buori ovttasbarggu Calissendorffiin, Liljestrand čállá SVT Sápmái.
Máŋggas guđđet komišuvnnaid
Duohtavuođakomišuvnnas earráneapmi ii leat eahpedábálaš Sámis iige earáge guovlluin máilmmis.
Ruoŧa beal komišuvnnas lea earránan jo máŋga lahtu: Britta Marakatt-Labba ja Mikael Svonni heittiiga komišuvnnas jo álgomuttus persovnnalaš sivaid geažil. Ruoŧa soabadankommišuvnnas álggahedje álgoálggus oktiibuot 13 lahtu oktan jođiheaddjiin.
Seamma geavai maiddái ovdamearkka dihte Suoma bealde, go komissárat Miina Seurujärvi ja Heikki J. Hyvärinen earráneigga duohtavuođa- ja soabadankomišuvnnas. Dasa lassin maiddái kommišuvnna álgoálgosaš váldočálli Ánneristen Juuso guđđii barggus kommišuvnnas.
Ruoŧa beal soabadankomišuvnna bargu galgá šaddat gárvvis 1.12.2025.
Suoma bealde duohtavuohta- ja soabadankomišuvdna galgá dálá dieđuid mielde geiget raportta stáhtaráđđái, Sámediggái ja nuortalaččaid siidačoahkkimii 30.11.2023.
Norgga duohtavuođa- ja soabahankommišuvdna fas geigii raporttas ja gávcci sierračielggadeami Stuoradiggái 1.6.2023.