Sámedikki stivra lea gieđahallan 131 njulgengáibádusa, mat gusket válgalávdegotti mearrádusaid válgalogahallamis. Stivra čoahkkimasttii maŋŋebárggas gaskavahkkui.
Sámedikki ságadoalli Tuomas Aslak Juuso muitala, ahte stivra lea vudjon vuđolaččat juohke áidna njulgengáibádussii. Son ii kommentere, galle gáibádusa hilgo dahje dohkkehedje.
– Dan lea veadjemeahttun kommenteret, juohke ášši lea individuála gáibádus ja dan ferte árvvoštallat dan vuođul. Jus lea duhtameahttun min mearrádussii, de olmmoš sáhttá ieš árvoštallat háliidago váidit ášši alimus hálddahusriektái, čilge Juuso.
Álgoálggus válgálávdegotti mearrádusain válgalogahallamis ledje mearreáiggi siste dahkkon sullii 180 njulgengáibádusa vuos válgalávdegoddái. Válgalávdegoddi dohkkehii dain vádjit 20. Válgalávdegotti mearrádusaide duhtameahttumat ohce njulgengáibádusaid Sámedikki stivrras.
Stivrra mearrádusaide sáhttá ohcat rievdadusa vel alimus hálddahusrievttis 14 jándor siste mearrádusa oažžumis. Alimus hálddahusriekti ii dán muttus kommentere ášši.
Njulgengáibádusaid gieđahallanáigi lea boktán kritihka
Sámedikki válgalávdegoddi nannii válgalogahallama njukčamánus. Dalle dat almmuhii, ahte lea mearridan leat čáhkatkeahttá alimus hálddahusrievtti dohkkehan olbmuid válgalogahallamii.
Earet eará dálá sámediggeáirras, válgalogahallamis eret gahččan Kari Kyrö mielas stivra ájahalai diđolaččat ášši gieđahallama. Maiddái Suoma riikkabeivviid veahkkevuoigatvuođaáššeolmmoš Maija Sakslin anii gieđahallanáiggi problemáhtalažžan, dasgo evttohasásaheapmi dán čavčča sámediggeválggaide nohká jo 4. beaivve borgemánu. Dat dárkkuha dan, ahte alimus hálddahusriekti ii geargga moge čoavdit rievdadusohcamušaid ja nuba dát olbmot eai sáhte álgit goit evttohassan.
Sakslin mielas jietnavuoigatvuhtii guoski gažaldagat galggašedje leat čovdojuvvon ovdal evttohasásaheami.
Ságadoalli Tuomas Aslak Juuso lea diđolaš dáin cuiggodemiin. Su oainnu mielde dakkár áigetávval lea dábálaš sámediggeválggain.
– Juohke válggain lea dát áigetávval leamaš. Jus veardida ovddit válggaide, de mii leat golbma vahku árat jođus dál. Mii leat dál bargan vel buorebut ja geargan johtileappot beassan daid áššiid gieđahallat, oaivvilda Juuso.
– Mii leat atnán dehálažžan, ahte nu johtilit go vejolaš muhto goittotge vuđolaččat meannudit daid áššiid. Ii daid áššiid sáhte hoahpuin gieđahallat, lasiha vel Juuso.
Ášši divvojuvvon 4.8.2023 dii. 9.40: Rievdadusa ohcanáigi alimus hálddahusriektái lea 14 jándora. Áššis muitaluvvui vuos 30 jándora.