Alimus hálddahusriekti lea mearridan, ahte jagi 2023 sámediggeválggaid galgá lágidit ođđasit. Mannan čavčča válljejuvvon Sámediggi lea geargan doaibmat easka moadde mánotbaji. Ođđa áirasat leat čoahkkanan oktii ortniiduvvančoahkkimii.
Alimus hálddahusrievttis leamašan jođus badjel čuođi sámediggeválggaid válgalogahallama ja válgabohtosa guoski váidaga.
AHR mielde jagi 2023 sámediggeválggat eai lea doaimmahuvvon lágalaččat, dasgo válgalogahallama olggobeallái leat guđđojuvvon 65 olbmo, geaid livččii galgan AHR mearrádusaid vuođul dohko merket. Dáin olbmuin ii leat leamašan vejolašvuohta vuolgit válggaide evttohassan dahje jienastit válggain, cealká AHR.
Válgalogahallama oasil gažaldat lei válggaid doaimmaheapmái gullevaš doaimmas, mii lei lága vuostá. Alimus hálddahusrievtti mielde dát lea váikkuhan válggaid bohtosii. Go válgabohtosa ii leat šat bastán njulget, de danin válggaid galgá čađahit ođđasit, cealká AHR.
Oktiibuot AHR attii otne gaskavahkko golbma áššái gullevaš mearrádusa, mat guske válgalogahallamii merkema, válggaid gomiheami ja válggaid ođasmahttima.
Sámedikki ságadoalli: ”Duođalaš dilli”
Sámedikki ságadoalli Pirita Näkkäläjärvi oainnu mielde dilli lea duođalaš. Sámedikki stivra gieđahallá AHR mearrádusaid badjelmearálaš áššin otná čoahkkimisttis.
– Mii oahpásmuvvat alimus hálddahusrievtti mearrádusaide dárkilit. Dassážii go ođđa válggat lágiduvvojit, de lea dehálaš sihkkarastit, ahte Sámedikki doaibma sáhttá joatkašuvvat dábálaččat. Mis lea olu bargu buot golmma Suomas ealli sámegiela, sámekultuvrra ja buot árbevirolaš sámi ealáhusaid ovdii, deattuha Näkkäläjärvi.
Sámedikki ságadoalli sávvá, ahte sámediggeláhkaevttohusa gieđahallan joatkašuvvá riikkabeivviin nugo lea plánejuvvon. Näkkäläjärvi oaivvilda, ahte lága divvun sáhttá čoavdit dili, dasgo dálá láhka lea boarásmuvvan ja lea dagahan olu ruossalasvuođaid.
Sámedikki válgalávdegotti ságadoalli Aslak Pieski ii hálit kommenteret ášši vel dán muttus.
Válgalávdegoddi ii čáhkadan buohkaid válgalogahallamii
Sámedikki válgalávdegoddi čohkke válgalogahallama ođđasit juohke válggaid oktavuođas. Jagi 2023 válggaid válgalogahallan nannejuvvui jahki dassái njukčamánus.
Válgalávdegoddi ii čáhkadan logahallamii 86 olbmo, geaidda AHR lei ovddit válggain addán jienastanrievtti Sámedikki oainnu vuostá.
Válgalávdegoddi ákkastalai mearrádusa dainna, ahte sin geatnegasvuohtan lea viggat dorvvastit dan, ahte válgalogahallan čuovvu lága ja álbmogiidgaskasaš olmmošvuoigatvuođasoahpamušaid.
ON olmmošriekte- ja nállevealahankomiteat leat gávnnahan, ahte Suopma lea rihkkon riikkaidgaskasaš soahpamušaid, go alimus hálddahusriekti lea dohkkehan olbmuid Sámedikki dáhtu vuostá válgalogahallamii. Dát jienastuslohkui dohkkeheamit leat loavkidan sámiid iešmearridanrievtti, ákkastalai válgalávdegoddi.
Maid ovdamearkka dihte jagi 2019 válggain Sámedikki válgalávdegoddi geavahii iešnjulgema ja válddii lagabui čuođi olbmo eret jienastuslogus.
Sámedikkeáirasat jotket doaimmas dassái ođđa válggaid boađus lea nannejuvvon
Alimus hálddahusrievtti mearrádusas deattuhuvvo, ahte dáláš Sámedikki lahtut ja várrelahtut bissot doaimmasteaset dassážii, go ođđa válggaid boađus lea nannejuvvon.
Mearrádusa mielde ođđa válggain galgá geavahit giđđat 2023 nannejuvvon válgalogahallama. Lassin vuhtii galget váldojuvvot dat 65 olbmo, geaid AHR lea dál mearridan lasihuvvot válgalogahallamii.
Ođđa válggain galgá leat maid ođđa evttohaslistu, go válgalogahallama olggobeallái báhcán olbmuin ii leat leamašan vejolašvuohta searvat evttohasásahallamii mannan čavčča válggain, cealká AHR.
Sámediggelága mielde ođđa válggat galget doaimmahuvvot guovtte dievas mánotbaji geažes das, go mearrádus lea addojuvvon.
Divvojuvvon 10.4.2024 diibmu 13:30: Divvojuvvon válgalogahallama olggobeallái guđđojuvvon olbmuid mearri. Árat alimus hálddahusriekti muitalii ahte sáhka lei 72 olbmos. AHR nannii 10.4.2024, ahte dieđáhusaide lei báhcán čállinmeattáhus ja rivttes lohku lea 65.