Nuõrttsääʹmǩiõl mättʼtõõzz viiǥǥât ooudâs Aanar kååʹddest. Mõõnni čõõuč Âʹvvlest altteeš vuõss vuâra sääʹmǩiõllsaž ouddškooulklaass da kååʹddest haaʹleet juäʹtǩǩed seämma ouddnummuž.
– Tõn mieʹldd ko ouddnummuš lij šõddâm, de leäʹp lââʹzztam resuursid. Ouddškooulklaassâst lie kueʹhtt škooulneeʹǩǩ da pueʹtti eeʹjj lie pueʹttmen lââʹss škooulneeʹǩǩ. Âʹvvlest mättʼtõs lij ravsmeʹmmen da vuäǯǯmen põõšši hääʹm, mušttal Aanar čuõvtemjååʹđteei Ilkka Korhonen.
Eeʹjjest nobba Aanar kååʹdd škooulin tuejjeet seʹlvvtemtuâj, mäʹhtt nuõrttsääʹmǩiõllsaž mättʼtõõzz vueiʹtet tuejjeed põõššjen. Eeʹjj aalǥâst narodteâttriâžldõʹǩǩe pueʹtte ođđsummus teâđ sääʹmǩiõllsaž päärnain. Siʹjjid haaʹleet taʹrjjeed sääʹmǩiõllsaž mättʼtõõzz da mättmateriaal.
– Meeʹst lie uʹcc škooul da mättʼtemjoouk. Meeʹst feʹrttai juõʹǩǩ eeʹjj smiõttâd päärnai mieʹrid da måkkam joouk täin šâʹdde škooulid.
Pueʹtti lookkâmpââʹj plaaneeškuäʹđet ǩeâđđa
Korhonen mieʹldd škooul rehtor da čuõvtemtåimm plaaneeškuäʹtte ǩeâđđa pueʹtti lookkâmeeʹjj: måkkam taarb lie ouddmiârkkân ougglõsmättʼtõʹsse da måkkam klassjoouk lie šõddmen kååʹdd škooulid.
Sääʹmǩiõllsaž mättʼtõõzzâst lie še eeʹjjest nobba seämma vaiggâdvuõđ, ko tuâjjlain jie leäkku ââʹntemvuõđ uʹčteeʹl viiʹrjid.
Tän poodd Aanar kååʹddest lij tåʹlǩ õhtt sääʹmǩiõllsaž uʹčteeʹl veʹrǧǧ. Tõn lââʹssen kååʹddest lie kueʹhtt uʹčteeʹl, koin jie leäkku veeʹrj. Nuʹbb juõʹǩǩekksaž vaiggâdvuõtt lij mättmateriaali vääʹnn, kååʹtt vaaikat uʹčteeʹli tuõjju.
– Ǩeâđđa vueiʹnnep še, što lie-a ođđ tuâjjla. Måtam iiʹjji lij leämmaž vaiggâd kaunnâd oummuid, leâša siõmmnai siõmmnai tõt lij še puârrnam. Meeʹst lie oummu, kook haaʹlee viikkâd ooudâs mättʼtõõzz, särnn Korhonen.
Taʹnni Aanar kåʹdd alttii Saujj-Vaʹrjjel kooʹddin haʹŋǩǩõõzz, koin haaʹleet oouʹdeed raaj râstldeei õhttsažtuâj sääʹmǩiõl da -kulttuur jeälltem diõtt.
Vaiggâdvuõđin huõlǩani Korhonen vuäinn, što ââʹn sääʹmǩiõllsaž mättʼtõʹsse haaʹleet piijjâd resuursid.
– Mij ǩiččlõõttâp viikkâd aaʹššid ooudårra škooul beäʹlnn da muđoi še tän kulttuurpirrõõzz.