Eana- ja meahccedoallováljagoddi lea addán cealkámušas sámediggeláhkaevttohusas.
Váljagoddi gieđahallá evttohusa erenomážit sin doaibmasuorggi ealáhusaid oainnus. Ruonáid ja gurutlihtu riikkabeaijoavkkut guđđe cealkámušas oktasaš sierraoaivila.
Váljagoddi deattuha cealkámušas, ahte ođđa sámediggelága ovttasdoaibman- ja ráđđádallangeatnegasvuohta ii oaččo addit Sámediggái veto-rievtti ealáhusaid ovddidan- ja eanangeavahanáššiin.
Láhkaevttohusa ovttasdoaibman- ja ráđđádallangeatnegasvuođa guoski paragráfa mielde eiseválddit galget ráđđádallat Sámedikkiin dalle go dat válmmaštallet láhkaásaheami, hálddahuslaš mearrádusaid dahje eará doaimmaid, main lea erenoamáš mearkkašupmi sámiide. Ulbmilin lea beassat ovttaoaivilvuhtii Sámedikkiin dahje oažžut Sámedikki miehtama ovdal mearrádusa dahkama.
– Váljagoddi atná dehálažžan, ahte ealáhusaid ovddideamis ja eanageavaheami plánemis doaibmaváldi bissu guovllu eiseválddiin, iige láhkaevttohusa ovttasdoaibman- ja ráđđádallangeatnegasvuohta šatta veto-riektin, baicce sáhka lea eakti ráđđádallamiin, main figget gávdnat oktasaš áddejumi, cealkámušas čállo.
Cealkámuša mielde dan ferte čielggasmahttit, makkár fidnut ja doaimmat gullet ovttasdoaibman- ja ráđđádallangeatnegasvuhtii, vai sáhttet sihkkarastit eana- ja meahccedoalu ovddideami dáfus vealtameahttun doaibmaeavttuid.
Sierraoaivil: Sáhka ii leat veto-rievttis
Ruonáid ja gurutlihttu riikabeaijoavkkuid sierraoaivilis deattuhit, ahte evttohuvvon ráđđádallan- ja ovttasdoaibmangeatnegasvuođas ii leat sáhka veto-rievttis, eaige dakkára leat oba evttohange.
– Ráđđádallan- ja ovttasdoaibmangeatnegasvuođa guoski ásahusat eai mearkkaš veto-rievtti, muhto dat eai oaččo báhcit dakkárin, man eai geavadis čuovo dahje bere formalitehtan. Meannudeami ulbmilin galgá leat duođalaš dáhttu dorvvastit ja vuhtii váldit álgoálbmoga jiena ja rivttiid buoremus lági mielde dalle, go mearrádusaid dahket, ákkastallet sierraoaivils.
Eana- ja meahccedoallováljagotti cealkámuš lea dahkkon vuođđoláhkaváljagoddái sin smiehttamuša várás. Gaskavahku válmmaštuvai maiddái bargo- ja dásseárvováljagotti cealkámuš.