Suoma Sámediggi lea láven ávvudit ođđa doaibmabaji rahpandoaluiguin. Sámedikki stivra goittotge mearridii šluhttet válgabaji ávvudoaluid doaibmabajis 2024–2027 stáhta seastindoaimmaid geažil.
Doalut livčče máksán unnimustá 40 000 euro buot dulkongoluiguin, dadjá Sámedikki hálddahushoavda Pia Ruotsala-Kangasniemi. Stuorát doaluide manašii juoba 70 000 euro.
– Stivra lea mearridan, ahte dán válgabaji áigge eat doala ávvudoaluid, justa daid seastindoaimmaid dihte mat leat, mat gusket maid midjiide, lohká Ruotsala-Kangasniemi.
Sámedikki stivra dagai mearrádusa čoahkkimisttis 29.2.2024 danin go jagi 2024 bušeahttaárvalusas eai lean resurssat doaluid várás. Sámediggi lea gártan seastit váile 200 000 euro, muitala Ruotsala-Kangasniemi.
Doaluid várás láven seastit máŋga jagi
Ruotsala-Kangasniemi fuomášahttá, ahte ovddit doaluid várás Sámediggi lea čohkken ruđaid ávvudeami várás ovddit jagiid seasttuin, danin go jahkásaš ruhta ii okto reahkkášii.
Ovdamearkka dihte ovddit ávvudoalut válgabadjái 2020–2023 lágiduvvojedje 17.6.2022 ja feastta bušeahtta lei 65 000 euro. Doalut ruhtaduvvojedje jagi 2019 báhcán stáhtadoarjagis.
Rahpandoaluid lágideami várás leat láven vuođđudit bargojoavkku ja bálkáhit mearreáigásaš bargi.
Rahpandoaluid guossin leamašan maid stáhta njunnošat
Válgabaji ávvudoaluin leamašan guossin sihke presideanttat ja stáhtaministarat. Dat leamašan buorre liiba maid loktet Sámedikki eambbo oidnosii.
– Dieđusge dien láhkai stuorra mearkkašupmi rahpandoaluin lea, ahte jos buot Suoma njunnošatge livčče beassan. Dathan lea álo stuorra mearkkašupmi ja Sámedikki áirasat ja buot ávvuguossit.
Ovdamearkka dihte jagi 2022 dalá stáhtaministtar Sanna Marin lei guossin Sámedikki ovddit válgabaji rahpandoaluin. Dalle doalut lágiduvvojedje koronaepidemiija dihtii easkka válgabaji goalmmát jagi.
Mearrádus šluhttet doaluid ii lean álki, muhto lei jo ovddalgihtii dieđus ahte seastidoaimmaid šaddet dahkat, lohká Ruotsala-Kangasniemi.
– Dieđusge dalle lea veadjemeahttun ordnet.