Stáhtaráđđi evttoha riikabeivviide, ahte Deanu čázadagas ii galgga leat lohpi bivdit luosa boahtte geasi.
Láhka galggašii boahtit fápmui geassemánu álggu rájes.
Eana- ja meahccedoalloministeriija dieđáhusa mielde mannan geasi álgán luossabivdogildosa fertejedje joatkit, go luossanáliid dilli lea ain nu heitot olles Deanu čázadagas.
Ministeriija ráđđádalli virgeolmmoš Tapio Hakaste muitalii Lapin Kansa aviisii ovdal stáhtaráđi čoahkkima, ahte ministeriijas ii leat eará vejolašvuohta go gieldit luossabivddu oalát Deanus.
– Luossanálit leat hedjonan ja jus dat joatkašuvvá seamma láhkai, de mannat gitta bodnái, dadjá Hakaste.
Stáhtaráđđi: Luossanálli hedjonan jagi 2017 rájes – duomut eai váikkut bivdui
Alimus riekti celkkii árat dán mánus, ahte sápmelaš guolásteddjiin lei riekti bivdit ruovttujogastis bivdoráddjehusain fuolakeahttá. Alimus rievtti duomu mielde sápmelaččain lea guolásteapmái vuođđolágalaš riekti.
Stáhtaráđđi lea evttohusastis vihkkedallan alimus rievtti duomuid váikkuhusaid boahtte geasi guolástanmearrádusaide. Evttohusa mielde dálá dilis mearkkašahtti lea dat, ahte oalgejogaid luossanáliid dilli lea hedjonan jagi 2017 rájes, iige Deanu čázadagas leat badjelmearálaš guolli man bivdit.
Stáhtaráđđi oaivvilda, ahte Deanu bivdoduomut leat ovttaskas áššit ja luossanáliid dilli lea hedjonan dan rájes, go bivdorihkkosat leat dáhpáhuvvan jagis 2017. Ráđđehusa evttohusas boahtá ovdan, ahte ulbmilin lea dorvvastit luossanáliid Deanu čázadagas, eaige alimus rievtti duomut rievdat dili.
Sámediggi: Alimus rievtti duomuid galgá váldit vuhtii
Sámediggi lei gáibidan, ahte alimus rievtti duomuid ferte váldit vuhtii Deanu boahtte geasi guolástanmearrádusain. Sámedikki vuosttas várreságadoalli Anni Koivisto dadjá Sámedikki dieđáhusas, ahte alimus rievtti mearrádusat čájehedje dan, ahte sámiid vuođđorivttiid galgá gudnejahttit láhkaásahanbarggus.
– Deanuleagi sápmelaččain galgá leat vuoigatvuohta hárjehit iežaset kultuvrra ja dán galgá váldit vuhtii Deanu boahtte geasi guolástanmearrádusain, dadjá Koivisto.
Koivisto mielde alimus rievtti mearrádusat leat dehálaš lávki sámiid guolástanrivttiid dovddasteapmái.
– Dát lea hui stuorra ášši olles sámi álbmogii, erenomážit deatnogáttesámiide. Sámedikki áddejumi mielde mearrádusat eai goittotge oaivvil dan, ahte deatnogáttesámit sáhtášedje guolástit boahtte gease beroškeahttá njuolggadusain, muhto mii baicce galgat čájehit ovddasvástádusa ja máššat dorvvastit hedjonan luossanáli ealáskeami, dadjá Koivisto.
Beaivvi ságaid ja Yle Ođđasiid Sámis sáhtát maid guldalit Yle Areenas.