Sámedikki válgalávdegoddi lea čoahkkimisttis vuossárgga mearridan, ahte ođasmahtton válggaid jienaidlohkan álgá maŋŋebárgga diibmu 8. Vuosttas diehtu válgabohtosis muitaluvvo dieđihandilálašvuođas gaskavahku diibmu 12.30.
Válgalávdegotti ságadoalli Aslak Pieski čujuha vátna resurssaide ja bargiid buresveadjimii sivvan, manin jienaidlohkan álggahuvvo easkka maŋŋebáriđit.
– Sámedikki bargit leat das barggus, amaset sii gártat beaivebarggu ja de idjabarggu ja de fas beaivebarggu vel dan maŋŋá. Vehá govttolašvuođa ja láhka addá dasa vejolašvuođa.
Válgalávdegoddi nanne válgabohtosa gaskavahku eahkes diibmu 18.
– Dan mun dieđán, ahte sápmelaččainhan gal lea máššu vuordit. Dathan lea sápmelaš oahppan duoddut vuordit daid bohtosiid, jeđđe Pieski daid, geat jo mášoheamit vurdet válgabohtosa.
Yle Sápmi sádde njuolggosáddaga Yle Areenas gaskavahku válgalávdegotti dieđihandilálašvuođas.
AHR mearridii ođđa válggaid
Alimus hálddahusriekti mearridii njukčamánus lágidit ođđasit válggaid, go Sámedikki válgalávdegoddi ii lean merken válgalogahallamii olbmuid, geaid AHR lei mearridan dohko merket. Dát olbmot eai beassan jienastit dahje álgit evttohassan čavčča válggain.
AHR mearridii válgalávdegotti merket 65 olbmo válgalogahallamii.
Ođđa válggain ledje mielde 35 evttohasa. Dat lea okta eambo go čakčat. Evttohasain viđas eai lean mielde čavčča válggain.